31 պատգամավոր հերթագրվել է, ինչ է թե աշխատավարձի մասին հարց ունի. Արտաշես Գեղամյան

23.10.2013, tert.am

ԱԺ «Հանրապետական» խմբակցության պատգամավոր Արտաշես Գեղամյանը «Պետական պաշտոններ զբաղեցնող անձանց վարձատրության մասին» ՀՀ օրենքի նախագծի քննարկմանը նկատեց, թե իրենք պետք է քննարկումները ենթարկեցնեն այն հարցադրումներին, որով հանդես է եկել ՀՀ նախագահը և Հանրապետական կուսակցությունը՝ նախընտրական քարոզարշավի ժամանակ ստանձնած պարտավորությունների ընթացքում։

«Հիմա պրոֆեսիոնալ Վաչե Գաբրիելյանի փաստարկները և ընդդիմախոսների փաստարկները չէին հակասում Սահմանադրությանը, բայց դե հանձնարարված է այդկերպ հարցը ներկայացնել, ինչն էլ որ արվեց։ Խնդիրը կայանում է նրանում, որ մեր հանրությունը և, ինչու չէ, ընդդիմությունը կասեն ժողովրդի խնդիրները տեսեք, և հիմա 31 պատգամավոր հերթագրվել են, ինչ է թե իրենց աշխատավարձի մասին հարց ունեն»,- հայտարարեց նա։

Արտաշես Գեղամյանը խնդրեց՝ նման խոցելի իրավիճակում հանդես գալուց առաջ պետք է քաղաքական շահարկումները կանխատեսել և կանխարգելել դրանք։ «Կարևոր փաստ պետք է արձանագրել, որ, այնուամենայնիվ, հնարավոր դարձավ 2014թ-ից ՀՀ ամենատարբեր խավերի ներկայացուցիչների աշխատավարձերի բարձրացումը, ինչն իր հերթին կհանգեցնի աղքատության կրճատման, ինչն էլ իր հետևից կբերի արտագաղթի փոքր-ինչ մեղմանն ու աշխատատեղերի ստեղծմանը»,- նշեց նա։

Գեղամյանը հիշեցրեց, Կառավարությունը փորձում է կյանքի կոչել հանրապետության նախագահ Սերժ Սարգսյանի այն երեք հիմնական հարցադրումները, որոնցով նա հանդես էր եկել նախագահական ընտրություններից առաջ։

«Քննարկումն այս հունով պետք է գնար, և ոչ թե այն հունով, որ գնաց, ինչ էլ բերեց տարընթերցումների»,- նշեց նա՝ ընդգծելով, թե ընդդիմադիր պատգամավորների կողմից նույնպես ճիշտ հարցադրումներ արվեցին։

 Տպավորություն է , որ այդ կնոջ ազնիվ մղումները փորձում են ենթարկեցնել այլ նպատակների. Ա. Գեղամյանը Զ. Փոստանջյանի մասին

26.09.2013, tert.am

Tert.am-ի հետ զրույցում Եվրասիական ինտեգրման հայտնի կողմնակից, «Ազգային միաբանություն» կուսակցության նախագահ, ԱԺ «Հանրապետական» խմբակցության անդամ Արտաշես Գեղամյանն անդրադարձել է ԱԺ «Ժառանգություն» խմբակցության պատգամավոր Զարուհի Փոստանջյանի հետ երեկվա միջադեպին և այն մեկնաբանություններին, որ հնչում են:

-Պարոն Գեղամյան, ինչպե՞ս կմեկնաբանեիք Զարուհի Փոստանջյանի հետ երեկվա միջադեպը:

-Ձեր նման փորձառու լրագրողը միջադեպին լուրջ արձագանքելու նախապայման պետք է ընդունի այն, ինչը կարծում եմ ՝ արդարացված է: Այն է՝ երկու կողմերի արձագանքը. մենք այսօր ունենք մեր լավ գործընկերուհու՝ Զարուհի Փոստանջյանի հայտարարությունը, բայց մենք ամենևին չունենք մյուս կողմի, այն է՝ մեր սահմանները թուրք-ազերիներից պաշտպանող ռուս սահմանապահների պատկան մարմնի արձագանքը: Ուստի, մեկնաբանել միայն մի կողմի կարծիքը, չունենալով զինանոցում մյուս կողմի արձագանքը, ում մեղսագրվում են տվյալ գործողությունները, կարծում եմ, որ սխալ կլինի:

Սակայն այսքանով չէի ցանկանա սահմանափակել Ձեր կողմից տրված հարցի պատասխանը: Մասնավորապես, ուզում եմ ասել, որ վերջին շրջանում, այն է՝ սեպտեմբերի 3-ից հետո, երբ Մոսկվայում մեր երկրի նախագահ Սերժ Ազատի Սարգսյանը և Ռուսաստանի Դաշնության նախագահ Վլադիմիր Պուտինը հանդես եկան համատեղ հայտարարությամբ, ուր մասնավորապես ասվեց, որ Հայաստանի Հանրապետությունը ցանկություն է հայտնել անդամակցել Մաքսային միությանը, որոշակի ուժեր բուռն ակտիվություն դրսևորեցին: Այն է՝ փորձելով աղավաղել Մաքսային միությանը Հայաստանի անդամագրվելու հետ կապված հնարավոր զարգացումները: Ըստ որում, դա անում էին ոչ պրոֆեսիոնալ մակարդակով, դա անում էին հապճեպ, ուղղակիորեն աղավաղելով փաստերը:

Ի՞նչ է, երբ ՀՀ-ն անդամագրվեց ՀԱՊԿ-ին կամ ԱՀԿ-ին՝ ինքնիշխանության որոշակի մաս չզիջեց. Արտաշես Գեղամյան

26.09.2013, tert.am

ԱԺ «Հանրապետական» խմբակցության պատգամավոր Արտաշես Գեղամյանը ինքնիշխանությունը կորցնելու գնահատականը համարում է մակերեսային և հարց է տալիս, թե երբ ՀՀ-ն անդամագրվեց ՀԱՊԿ-ին կամ Առևտրի համաշխարհային կազմակերպությանը (ԱՀԿ) ինքնիշխանության որոշակի մաս չզիջե՞ց:

«Մենք այդ մասին բազմիցս ասել ենք, հիմա Ռուսաստանի դեսպանը պետք է ասե՞ր, որ հասկանայինք։ Մաքսային միության կանոնադրության մեջ գրված է, որ Մաքսային միությունը աշխարհի մյուս սուբյեկտների հետ առևտրատնտեսական հարաբերություններում հանդես է գալիս որպես մեկ միասնական տարածք՝ ներկայացնելով անդամ պետություններին։ Այսինքն՝ ստեղծվում է վերպետական մարմին, որը ներկայացնում է անդամ երկրներին, դրանով իսկ սուվերենության սահմանափակում է գնում»,- Tert.am-ի հետ զրույցում ասաց նա և ավելացրեց, որ մինչդեռ մեր իշխանությունը փորձում էր ակնհայտը հերքել։

Արտաշես Գեղամյանը ինքնիշխանությունը կորցնելու գնահատականը համարեց մակերեսային և սխալ. «Խորանալով բովանդակության մեջ և մակերեսային գնահատական տալը՝ սխալ է»։

Արտաշես Գեղամյանը խորհուրդ տվեց ամենայն ուշադրությամբ ընթերցել Եվրամիության մայր փաստաթուղթը, որտեղ կարելի է տեսնել, որ նույն սկզբունքն է գործում, ուստի նշեց, որ, բնականաբար, այն ինչը տարիներ շարունակ փորձարկվել է ԵՄ-ում, կլինի նաև Եվրասիական տնտեսական քաղաքականության մեջ։

Ստամբուլում ձախողվել է ԼՂ հարցի շուրջ Ադրբեջանի և Թուրքիայի պատվիրակների հակահայկական նախաձեռնությունը. Ա. Գեղամյան

03.07.2013, tert.am

Ստամբուլում այս օրերին ընթացող ԵԱՀԿ Խորհրդարանական վեհաժողովի նստաշրջանի ժամանակ իսկական հրաշք է տեղի ունեցել՝ հօգուտ Հայաստանի և Լեռնային Ղարաբաղի. Tert.am-ի հետ զրույցում ասաց ԱԺ «Հանրապետական» խմբակցության պատգամավոր, ՀՀ պատվիրակության անդամ Արտաշես Գեղամյանը, ում խոսքով՝ քվեարկությամբ ձախողվել է Թուրքիայի և Ադրբեջանի պատվիրակությունների՝ ԵԱՀԿ ԽՎ-ի քաղաքական հարցերի և անվտանգության ընդհանուր կոմիտեի «Հելսինկի գումարած 40» բանաձևում լրացումներ կատարելու հակահայկական նախաձեռնությունը:

«Ահա այս բանաձևի մեջ ադրբեջանական և թուրքական կողմերը՝ հանձինս պատվիրակության կազմի ղեկավարների, լրացումներ էին ներկայացրել, համաձայն որոնց բացասական գնահատական էր տրվում Մինսկի խմբի համանախագահների գործունեությանը, և առաջարկվում էր անհապաղ գումարել Մինսկի խմբի լիակատար նիստ, որտեղ ընդգրկված են մի շարք պետություններ և ամենակարևորը նաև Թուրքիան»,- նշեց Արտաշես Գեղամյանը:

Նա բացատրեց, որ ԵԱՀԿ Խորհրդարանական վեհաժողովում գործում է երեք հիմնական հանձնաժողով, որոնցից մեկի՝ քաղաքական և անվտանգության հարցերով հանձնաժողովի անդամն է Արտաշես Գեղամյանը: Այնտեղ ընդունված բանաձևը հետագայում հաստատվելով պլենար նիստում դառնալու է Խորհրդարանական վեհաժողովի հիմնական փաստաթուղթը:

Գեղամյանը նշեց, որ այս հարցի հետ կապված ինքը, բնականաբար, հանդես է եկել ելույթով: «Արձագանքիս իմաստն այն էր, որ նման բանաձևի ընդունումը ոչ այլ ինչ է, եթե ոչ անվստահություն ԱՄՆ-ի, Ֆրանսիայի և Ռուսաստանի Դաշնության նախագահներին, որոնք վերջերս՝ հունիսի 18-ին, Մեծ Բրիտանիայի Լոքեր քաղաքում ԼՂ հարցի վերաբերյալ ընդունած համատեղ հայտարարությամբ բացառիկ, ճշգրիտ հարցադրումներ են արել, որոնք շահեկանորեն տարբերվում են մինչ այդ չորս անգամ իրենց իսկ կողմից ընդունված հայտարարություններից»,- ասաց ՀՀ պատվիրակության քաղաքական և անվտանգության հարցերով հանձնաժողովի նախագահը: